Kërkesën për urdhër mbrojtje emergjente mund ta parashtrojë viktima, përfaqësuesi i tij/saj, mbrojtësi i viktimave (me pëlqimin e viktimës), familjari i viktimës, përfaqësuesi i Qendrës për Punë Sociale apo personi i cili është në dijeni për dhunën e shkaktuar.
Kjo kërkesë parashtrohet kur viktima i është ekspozuar dhunës në familje dhe për shkak të rrezikshmërisë kërkohet reagim i shpejtë nga gjykata, si p.sh. viktima frikësohet se kryerësi i dhunës në familje do ta sulmojë përsëri. Kjo kërkesë duhet të përmbajë emërtimin e gjykatës që i drejtohet, të dhënat personale të viktimës (për shkaqe sigurie, viktima mund ta shkruajë një adresë tjetër alternative) dhe kryerësit të dhunës në familje, përshkrimin e fakteve se si ka ndodhur dhuna në familje duke ja bashkangjitur edhe provat që viktima posedon (dëshmitarë, foto, video, sms etj.), arsyen pse kërkohet urdhri mbrojtës si dhe masat mbrojtëse që propozon.
Për këtë kërkesë, gjykata duhet të mbajë seancë dhe të vendosë brenda 24 orëve nga parashtrimi i kërkesës. Pas shqiptimit të urdhrit për mbrojtje emergjente nga gjykata, kjo e fundit do të shqyrtojë nëse ka bazë për shqiptimin e urdhrit mbrojtës, i cili mund të shqiptohet për periudhën kohore deri ne 12 muajve, me mundësi vazhdimi edhe 24 muaj.
Përmes kërkesës, viktima mund të kërkojë nga gjykata që kryerësit të dhunës në familje ti shqiptohet masë e trajtimit psikosocial apo mjekësor, ti ndalohet afrimi me viktimën, shqetësimi i viktimës, largimi nga banesa/shtëpia, ti merren sendet me të cilat është kryer vepra penale si dhe ti shqiptohen masa pasurore, siç është urdhërimi për lejimin e viktimës që ta shfrytëzojë shtëpinë/banesën e përbashkët apo ndonjë pjesë të saj, obligimi për ta paguar qiranë për viktimën apo alimentacionin, ndalimi i shitjes së pasurive etj.
Përmes kërkesës për urdhër mbrojtje emergjente, Gjykata mund të urdhërojë shoqërimin e viktimës me qëllim të mbrojtës së të njëjtës gjatë marrjes së sendeve personale.
Shkarko: “Masat që mund të kërkohen përmes kërkesës për urdhër mbrojtje emergjente”
